പതിനഞ്ചു പവൻ സ്വർണവും ഒന്നേകാൽ ലക്ഷം രൂപയും കവർന്ന കേസിൽ കുപ്രസിദ്ധ മോഷ്ടാവ് പിടിയിൽ

താമരശ്ശേരി ● കൈതപ്പൊയിൽ നോളേജ് സിറ്റിക്കടുത്തുള്ള വീട്ടിൽ നിന്നും പതിനഞ്ചു പവൻ സ്വർണവും ഒന്നേകാൽ ലക്ഷം രൂപയും കളവ് നടത്തിയ കുപ്രസിദ്ധ മോഷ്ടാവ് ചാവക്കാട്  റഫീക്ക് എന്ന വെന്താട്ടിൽ റഫീക്കിനെ കോഴിക്കോട് റൂറൽ എസ് പി. കെ.ഇ ബൈജുവിൻറെ കീഴിലുള്ള സംഘം പിടികൂടി. ഇയാള് ഇപ്പോൾ താമസിക്കുന്ന മേപ്പാടി ടൗണിലുള്ള വാടകവീട്ടിൽ  നിന്നാണ് കോടഞ്ചേരി പോലീസും സ്പെഷ്യൽ സ്ക്വാഡും ചേർന്നു പിടികൂടിയത്. താമരശ്ശേരി ഡി.വൈ.എസ്.പി .പി. അലവിയുടെ നേതൃത്വത്തിൽ കേരളത്തിലെ സമാന രീതിയിലുള്ള മോഷ്ടാക്കളെ കേന്ദ്രീകരിച്ചു നടത്തിയ അന്വേഷണത്തിലാണ് പ്രതിയെ കുറിച്ച് സൂചന കിട്ടിയത്. കളവ് നടത്തിയ പത്ത് പവൻ ആഭരണങ്ങളും  രൂപയും വീട്ടിൽ ഒളിപ്പിച്ച  നിലയിൽ പോലീസ് കണ്ടെടുത്തു. മേപ്പാടിയിലെ ജ്വല്ലറിയിൽ വിൽപന നടത്തിയ മുപ്പത്തിനാല് ഗ്രാം സ്വർണവും കണ്ടെടുത്തു. 

സിസംബർ 28 ന് പുലർച്ചെയാണ് ഗൾഫിലും കോഴിക്കോട്, താമരശ്ശേരി എന്നിവിടങ്ങളിലും ട്രാവൽ ഏജൻസി നടത്തുന്ന വേഞ്ചേരി അരിയാർ കുന്നത്ത്,ഷൈജലിൻ്റെ വീട്ടിൽ കളവ് നടന്നത്. വീട്  പൂട്ടി ഊട്ടിയിൽ പോയ സമയത്താണ് കളവ് നടന്നത്. പുലർച്ചെ മൂന്ന് മണിക്ക് വീട്ടുകാർ തിരിച്ചെത്തിയപ്പോഴാണ് മുൻവാതിൽ  പൊളിച്ച നിലയിൽ കണ്ടത്. റൂമിൻ്റെ ഡോറും തകർത്ത് അലമാരയിൽ സൂക്ഷിച്ച സ്വർണവും പണവുമാണ് കവർന്നത്. കവർച്ചയ്ക്ക് ശേഷം പ്രതി സി സി ടി വി യുടെ ഹാർഡ് ഡിസ്ക് ഊരിയെടുത്ത് അടുത്ത് നിർമ്മാണം നടക്കുന്ന വീടിലെ വെള്ളത്തിൽ ഇട്ടിരുന്നു. പ്രതി ബൈക്കിൽ വൈകുന്നേരം അടിവാരം പുതുപ്പാടി ഭാഗങ്ങളിൽ കറങ്ങിയാണ് ആളില്ലാത്ത വീട് കണ്ടെത്തിയത്. 

2017 ൽ മലപ്പുറം ,തൃശൂർ, ജില്ലകളിൽ   നിരവധി വീടുകളും വാഹനങ്ങളും കവർച്ച നടത്തിയതിന് പിടിക്കപ്പെട്ടു   ജയിലിൽ കിടന്നതാണ് .പിന്നീട് മേപ്പാടിയിൽ ഭാര്യ വീട്ടിനടുത്തുവാടക വീടുകളിൽ മാറി മാറി താമസിക്കുകയായിരുന്നു. റിയൽ എസ്റ്റേറ്റ് , കച്ചവടം നടത്തുകയാണ് എന്നാണ് ഇയാൾ നാട്ടുകാരോട് പറഞ്ഞിരുന്നത്. മോഷണം നടത്തിയ  ബൈക്കുകളാണ് ഇയാള് കവർച്ചയ്ക്ക് ഉപയോഗിക്കുന്നത്. 2024 ഓഗസ്റ്റ് മാസം ,കൈതപ്പൊയിൽ വെഞ്ചേരിയുള്ള തോ ട്ടായിക്കുന്നു മ്മൽ അബ്ദുല്ല എന്നാളുടെ വീട് പൊളിച്ച്  മൂന്ന് പവൻ സ്വർണവും ഇരുനൂറുഡോളറും ഏഴായിരംസൗദി റിയാലും രണ്ടായിരത്തി അഞ്ഞൂറ് ഈജിപ്ഷ്യൻ പൗണ്ടും കവർച്ച നടത്തിയതും ഇയാളാണ്. കൂടാതെ പല ജില്ലകളിലും കൂടുതൽ കവർച്ച ഇയാൾ നടത്തിയതായി വിവരമുണ്ട്. 

കോടഞ്ചേരി ഇൻസ്പെക്ടർ സന്തോഷ് കളത്തിൽ,എസ് ഐ കെ.എസ്.ജിതേഷ് , സ്പെഷ്യൽ സ്ക്വാഡ് എസ് ഐ.മാരായ രാജീവ്  ബാബു, ബിജു പൂക്കോട്ട്, എ എസ് ഐ ജയരാജൻ പനങ്ങാട്, സീനിയർ സി പി ഒ ജിനീഷ് ബാലുശ്ശേരി, കോടഞ്ചേരി സ്റ്റേഷനിലെ എ എസ് ഐ. എ ബി.ബിനേഷ് , സീനിയർ സി പി ഒ സി. കെ.ഷനിൽ കുമാർ, ആർ. റജിലേഷ് , കെ.ടി റബീഷ്, സുനിൽ കുമാർ,എന്നിവരടങ്ങിയ സംഘമാണ് പ്രതിയെ പിടികൂടിയത്.